கருப்பு வேட்டி கட்டி
குளிருல குளிச்சி
செருப்பு போடாம
பீடி சிகரெட் புடிக்காம
தண்ணி வண்ணி குடிக்காம
கெட்ட வார்த்தை பேசாம
பல்ல கடிச்சிக்கிட்டு இருந்து
கல்லும் முள்ளும்
காலுக்கு மெத்தன்னு சொல்லி
கந்துவட்டிக்குக் கடன வாங்கி
மலைக்குப்   போயிட்டு வந்ததுல
ஒரே லாபம்
பத்துக்காசுக்குப் பொறாத என்ன
எல்லாரும்
சாமின்னு கூப்புட்டதுதான்

.............................................................................................

பேருந்தில் வந்த  போது
குழந்தையின்
பலூன் வெடித்தது
யாரும் கண்டுகொள்ளவில்லை
கொஞ்சதூரம் போனதும்
பேருந்தின் டயர் வெடித்தது
குழந்தை
அதைக் கண்டுகொள்ளவில்லை 

பேருந்து பயணத்தின் போது
வரிகள் நடுங்க
புத்தகம் படிக்கிறார்கள் சிலர்
அப்போது வரும்
சாலையோர துர்நாற்றத்திற்குச்
சட்டென்று
மூக்கைப் பொத்தாமல்
கடந்து போகிறார்கள்
புத்தகத்தின் நறுமணத்தில்
புதைந்தவாறு

 .....................................................................................