பெரிதினும் பெரிது

நீளம் தாண்டுதலில்
தங்கப் பதக்கம்
வாங்கிய கால்களை விட
உயர்வானது
எறும்புகளை மிதிக்காமலிருக்க

எட்டிக் குதித்த கால்கள்..

சூழ்நிலை

குருவிக் கூட்டின்
தொழில் நுட்பம் கொண்டு
அருவிக் கரையில் வீடு கட்டி
மேகம் தரும்
முதல் நீர் கொண்டு
தாகம் போக்கி
காற்றில் அவிழ்ந்த
பூவின் வாசம்
மூக்கில் மோத
தென்னங்கீற்று
மெல்ல வந்து
கன்னம் தடவ
இரை தேடச் செல்லும்
அதிகாலைப் பறவையின்
இரைச்சலில் கண்விழித்து
வாழ்ந்திடும் ஆசை கொண்ட நான்
வேலை நிமித்தமாய்
மாநகரொன்றில் வாழ்கிறேன்
ஐந்து பேரோடு
அறையைப் பகிர்ந்து ...

ஆச்சர்யம்

மூன்றாவது
பிள்ளைப்பேற்றின் போது
சிக்கலாகி இறந்து போனாளாம்
அத்தாயி பாட்டி
தலைப்பிரசவத்தின் போது
மாரடைப்பு வந்து
கண்ணுக்கு முன்னால்
உயிர் நின்றதாம்
சகுந்தலா அக்காவுக்கு
இதற்கெல்லாம் பயந்து போய்
அறுவை சிகிச்சை மூலம்
குழந்தை பெற்றேன் நான்
இருந்தும்
உயிர்போய் உயிர் வந்துவிட்டது
உதிரப்போக்கு நிற்காமல்
கொஞ்ச நேரம்
எப்படியென்றே தெரியவில்லை
தொடர்ந்து
சுகப்பிரசவமே நடக்கிறது
எங்கள் வீட்டு
நாட்டுப் பசுவுக்கு மட்டும்

இயல்பு

ஒன்று மழையைக்
கொட்டிப்போகிறது
இல்லை வெயிலால்
சுட்டெரித்துக் காய்கிறது
யாராலும்
அண்ணாந்து பார்க்கப்படாத
மாநகரத்து வானம்

முரண்

கொட்டுகின்ற வியர்வையைத்
தருகின்ற கோடை வெயிலைக்
காட்டிலும்
கோபம் அதிகம் தருகிறது
குடிநீரைச் சூடாக்கும்
சாதாரண வெயில்